Aliyev Baydenning armanlar genotsidi to‘g‘risidagi bayonotini «tarixiy xato» deb atadi

Ozarboyjon prezidenti Ilhom Aliyev Turkiya prezidenti Rajab Toyyib Erdo‘g‘an bilan telefon orqali muloqotida AQSh prezidenti Jo Baydenning XX asr boshida Usmoniylar imperiyasida sodir bo‘lgan voqealarni «armanlar genotsidi» deb baholaganini tarixiy xato deb atadi. Bu haqda Ozarboyjon prezidenti matbuot xizmati xabar bermoqda.

«Suhbat chog‘ida davlat rahbarlari AQSh prezidenti Jo Baydenning «armanlar genotsidi» bilan bog‘liq bayonotini qoraladilar. Prezident Ilhom Aliyev buni tarixiy xato deb atadi», – deyiladi xabarda.

Xabarda aytilishicha, Aliyev Ozarboyjon bu bayonotni qabul qilmasligini ta'kidlagan.

Avvalroq AQSh prezidenti Jo Bayden XX asr boshlarida Usmoniylar imperiyasida sodir bo‘lgan voqealarni «armanlar genotsidi» deb atagandi.

O‘z navbatida, Turkiya tashqi ishlar vaziri Mavlut Chovusho‘g‘li Anqara Baydenning bu bayonotini to‘laligicha inkor etishini ma'lum qildi.