Yevrokomissiya koronavirusga qarshi emlangan xorijliklarga YeIga kirishga ruxsat berishni taklif qildi

Yevrokomissiya (YeK) koronavirusga qarshi emlangan xorij fuqarolariga Yevroittifoq hududiga kirishga ruxsat berishni taklif qildi. Bu haqda YeK bayonotida aytilmoqda.

Bunda ular YeIda ruxsat berilgan vaksinalardan biri bilan emlangan bo‘lishi lozim. Hozirda Yevroittifoqda AstraZeneca, Pfizer/BioNTech, Moderna va Johnson & Johnson vaksinalari ro‘yxatdan o‘tkazilgan. «Sputnik V» vaksinasi ekspertizadan o‘tkazilmoqda.

Bayonotda aytilishicha, xorij fuqarolari YeIga kelishidan kamida ikki hafta oldin koronavirusga qarshi vaksinaning har ikki dozasini olgan bo‘lishlari lozim.

Tashrif buyuruvchilar emlanganligini raqamli sertifikat orqali tasdiqlash imkoniyatiga ega bo‘lishlari talab etiladi.

Bundan tashqari, Yevrokomissiyaning qayd etishicha, epidemiologik vaziyat yaxshilangani tufayli Tailand, Avstraliya, Yangi Zelandiya, Singapur, Ruanda, Janubiy Koreya va Xitoy fuqarolari emlanganlik maqomidan qat'i nazar, Yevroittifoq hududiga kirishlari mumkin.