Putin Rossiyaning Tojikistondagi harbiy bazasi mustahkamlanishini aytdi

Rossiya prezidenti Vladimir Putin Moskvada Tojikiston prezidenti Imomali Rahmon bilan uchrashuvi chog‘ida Afg‘onistondagi vaziyat keskinlashgani sababli Rossiya Dushanbeni qo‘llab-quvvatlashini bildirdi.

«Hozirda mintaqada xavfsizlik masalasi birinchi raqamli masala. AQShning o‘z qo‘shinlarini olib chiqib ketishi to‘g‘risidagi bayonoti e'lon qilinishi bilan — amalda ular qo‘shinlarining yarmidan ko‘pini olib chiqib ketishdi — Afg‘onistonda vaziyat keskinlashdi», — dedi Rahmon.

Tojikiston prezidenti mamlakat Afg‘oniston bilan eng uzun chegaralardan biriga egaligini qayd etdi.

«Biz sizlarni qo‘llab-quvvatlash uchun o‘z tomonimizdan barcha ishlarni amalga oshiryapmiz – Tojikistonda Rossiya qurolli kuchlarining 201-harbiy bazasi faoliyat olib bormoqda. Biz uni, Tojikiston qurolli kuchlarini mustahkamlash ustida ishlayapmiz», — dedi Vladimir Putin.

Imomali Rahmon Vladimir Putinning taklifiga binoan Moskvaga amaliy tashrif bilan kelgan, u 9 may bayrami munosabati bilan o‘tkaziladigan tantanalarda ishtirok etadi.