Xorazmda pul evaziga haydovchilik guvohnomasi olib berishni va'da qilgan firibgarlar ushlandi

Xorazm viloyatida fuqarolarga pul evaziga haydovchilik guvohnomasi olib berishni va'da qilgan firibgarlar ushlangan. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.

Ma'lum qilinishicha, Bosh prokuratura huzuridagi Departament Xorazm viloyati boshqarmasi hamda viloyat IIB hamkorligida o‘tkazilgan tezkor tadbirda fuqarolarga pul evaziga haydovchilik guvohnomasi olib bermoqchi bo‘lgan firibgarlar ushlangan.

Jumladan, fuqaro G.M. haydovchilarni tayyorlashga ixtisoslashgan «X.» MChJ o‘qituvchisi S.I. va boshqalar bilan oldindan til biriktirib, 4 nafar shaxsga haydovchilik guvohnomalarini olib berish evaziga 750 AQSh dollari va 500 ming so‘mni firibgarlik yo‘li bilan olgan vaqtida ashyoviy dalillar bilan ushlangan.

Qayd etilishicha, mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.