Surxondaryoda tadbirkorning pullarini o‘zlashtirgan shaxslarga jinoiy ish qo‘zg‘atildi

Surxondaryo viloyati Angor tumanida tadbirkorning pullarini o‘zlashtirgan shaxslarga jinoiy ish qo‘zg‘atildi. Bu haqda Bosh prokuratura huzuridagi iqtisodiy jinoyatlarga qarshi kurash departamenti xabar bermoqda.

Ma'lum qilinishicha, Bosh prokuratura huzuridagi departamentning Angor tuman bo‘limi tomonidan tadbirkorlik sub'yektlarining huquqlarini himoya qilish yuzasidan o‘tkazilgan tergovga qadar tekshiruvda, «G.» MChJga qarashli 4 ta dorixonada pul mablag‘larini o‘zlashtirgan shaxslar aniqlangan.

Jumladan, MChJda sotuvchi vazifasida ishlagan fuqaro Sh.T. va boshqalar o‘zlarining moddiy javobgarligida bo‘lgan 75,6 million so‘mlik dori vositalarini hamda 142,2 million so‘m savdo pullarini bank muassasasiga topshirmasdan, talon-toroj qilgan.

Qayd etilishicha, mazkur holat yuzasidan Sh.T. va boshqalarga nisbatan Jinoyat kodeksining 167-moddasi (talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.