Qashqadaryoda ish paytida mast holda bo‘lgani aytilgan shifokor o‘z arizasiga ko‘ra ishdan bo‘shatildi

Qashqadaryo viloyati Chiroqchi tumanida ish paytida spirtli ichimlik iste'mol qilib, bemorlarga qaramayotgani aytilgan shifokor o‘z arizasiga ko‘ra ishdan bo‘shatilgan. Bu haqda viloyat sog‘liqni saqlash boshqarmasi xabar bermoqda.

Ma'lum qilinishicha, ijtimoiy tarmoqlarda Chiroqchi tumani yuqumli kasalliklar shifoxonasida ishlovchi vrach N.E. ish paytida spirtli ichimlik ichib, bemorlarga qaramayotgani haqida videomurojaat e'lon qilingan. Holat viloyat SSB tomonidan o‘rganilgan.

Qayd etilishicha, videomurojaat e'lon qilingan kunning o‘zida o‘tkazilgan narkolog tekshiruvida tuman yuqumli kasalliklar shifoxonasi shifokori N.E. spirtli ichimlik iste'mol qilmagani aniqlangan. Shu kunning o‘zida shifokor ijtimoiy tarmoq orqali navbatchilikda qattiq charchagani sababli bunday holat yuz berganini qayd etgan va bemorni qabul qilishda sustkashlikka yo‘l qo‘ygani uchun undan uzr so‘ragan.

Aniqlanishicha, shifokor N.E. voqeadan bir kun avval tasdiqlangan jadval asosida navbatchilikda bo‘lgan.

Shundan so‘ng 34 yil davomida yuqumli kasalliklar shifokori sifatida faoliyat yuritgan N.E. ma'muriyatga keksaygani sababli bundan keyin shifoxonada o‘z faoliyatini davom ettira olmasligini ma'lum qilib, o‘z arizasiga ko‘ra ishdan bo‘shagan.