Xorazmlik 9 sportchi Tokio-2020 olimpiadasida O‘zbekiston sharafini himoya qiladi

Tokio-2020 yozgi olimpiya va paralimpiya o‘yinlarida ishtirok etadigan o‘zbekistonlik sportchilar aniqlandi. Ularning orasida Xorazm viloyatidan 9 vakil bor.

Jumladan, dzyudo bo‘yicha musobaqalarda O‘zbekiston sharafini hazorasplik Gulnoza Matniyazova (70 kg vaznda) va bog‘otlik Farangiz Xajiyeva (63 kg) himoya qiladigan bo‘ldi.

Boks musobaqasida xivalik Dilshodbek Ro‘zmetov (81 kg), velosport musobaqalarida gurlanlik Murodjon Xolmurodov, erkin kurash musobaqasida urganchlik G‘ulomjon Abdullayev (57 kg) ishtirok etadi.

Shuningdek, paradzyudo musobaqalarida yangiariqlik Sevinch Salayeva (52 kg), bog‘otlik Uchqun Quranbayev (66 kg) va Nafisa Sharipbayeva (63 kg) o‘z kuchini sinab ko‘rishadi. Pauerlifting musobaqasida shovotlik Ro‘za Qo‘ziyeva (55 kg) ishtirok etadi.

Yozgi Olimpiada o‘yinlari 23 iyuldan 8 avgustgacha Yaponiya stadionlarida bo‘lib o‘tadi.