Norin daryosida cho‘kkan uch kishining ikki nafari qutqarildi, birining jasadi daryo tubidan topildi

Namangan viloyatida Norin daryosining Uychi tumani hududidan oqib o‘tuvchi qismida cho‘kkan uch kishining ikki nafari odamlar tomonidan qutqarilgan. Bir nafarining jasadi esa viloyat Favqulodda vaziyatlar boshqarmasi qutqaruv guruhi tomonidan daryo tubidan topilgan.

Ma'lum qilinishicha, 2021 yil 11 iyul kuni soat 16:46 larda Namangan viloyati FVB navbatchilik qismining 1050 qisqa raqamiga Uychi tuman «O‘nhayot» MFYda yashovchi, 1995 yilda tug‘ilgan R.R. hamda yana 2 nafar fuqarolar Uychi tuman «Qumtepa» MFY hududidan oqib o‘tgan Norin daryosida cho‘kib ketgani haqida xabar kelib tushgan.

Mazkur xabarga ko‘ra, voqea joyiga viloyat FVB Qutqaruv otryadining suvda qidiruv-qutqaruv guruhi yordamga kelib, suvda qidiruv-qutqaruv ishlarini amalga oshirgan.

Qayd etilishicha, qutqaruvchilar yetib kelguncha 2 nafar fuqaro mahalliy aholi tomonidan qutqarib olingan. Tezkorlik bilan olib borilgan suvda qidiruv-qutqaruv ishlari davomida fuqaro R.R.ning jasadi daryoning 2,5 metr chuqurligidan topilgan.