O‘zbekiston va Rossiyaning 1,5 mingga yaqin harbiy xizmatchisi Afg‘oniston bilan chegaradagi qo‘shma mashqlarda qatnashadi

Avgust oyida Surxondaryo viloyatidagi poligonda Rossiya va O‘zbekistonning 1,5 mingga yaqin harbiy xizmatchilari qo‘shma mashqlarda qatnashadi. Bu haqda Rossiya Mudofaa vazirligi xabar berdi.

Mashqlar 30 iyuldan 10 avgustgacha Afg‘oniston bilan chegaradosh mintaqadagi Termiz poligonida bo‘lib o‘tadi, unda 200ga yaqin harbiy texnika, shu jumladan aviatsiya ishtirok etadi.

Mashqlar doirasida qo‘shma kuchlar guruhi harbiy xizmatchilari Markaziy Osiyo mintaqasi davlatlarining hududiy yaxlitligini ta'minlash masalalarini ishlab chiqadilar.

Rossiya kontingentining asosiy qismini tinchlikparvarlik bo‘linmasi va Markaziy harbiy okrug maxsus maqsadli brigadasi harbiy xizmatchilari tashkil etadi.

Avvalroq, O‘zbekiston tojik-afg‘on chegarasidagi mashqlarga jangovar aviatsiya, zirhli texnika va maxsus kuchlarni yuborishi xabar qilingandi.