Finlandiyada qorako‘zanlar koronavirusga qarshi emlanadi

Finlandiya qorako‘zanlar koronavirusga qarshi emlanadigan Yevroittifoqdagi birinchi mamlakat bo‘ladi, deb xabar berdi Finlandiya mo‘ynali jonivor yetishtiruvchilar assotsiatsiyasi (FIFUR).

Qayd etilishicha, qorako‘zanlar FurcoVac vaksinasi bilan emlanadi. Vaksina Helsinki universiteti tadqiqotchilar guruhi tomonidan ishlab chiqilgan.

Finlandiya oziq-ovqat mahsulotlari xavfsizligi boshqarmasi qorako‘zanlarni emlashga ruxsat berdi. Dastlabki emlashlar yaqin haftalar ichida boshlanadi.

Tadqiqot direktori Yussi Peuraning so‘zlariga ko‘ra, vaksinani ishlab chiqish o‘tgan yil kuzida boshlangan. Hozirda yarim million dozaga yaqin vaksina ishlab chiqarilgan.

Finlandiyada mo‘ynali jonivorlarning koronavirus yuqtirish holati qayd etilmagan, ammo Latviya va Daniyada koronavirus yuqtirgan millionlab qorako‘zanlar yo‘q qilingandi.