OTB O‘zbekistonga xususiy investitsiyalarni jalb qilishga ko‘maklashadi

OTB O‘zbekistonda infratuzilmaviy loyihalarini amalga oshirish jarayoniga moliyalashtirishning yangi vositalarini joriy etishga va xususiy investitsiyalarni jalb qilishga ko‘maklashishi to‘g‘risida kelishuvga erishildi.

Shuningdek, sog‘liqni saqlash, ta'lim, qattiq chiqindilarni boshqarish hamda uy-joy va kommunal xizmatlar kabi boshqa ustuvor sohalarga qayta tiklanadigan energiya manbalari sohasida davlat-xususiy hamkorlik mexanizmlarini joriy etishning muvaffaqiyatli tajribasini kengaytirish yuzasidan hamkorlik yo‘lga qo‘yiladi.

Strategik rivojlanish agentligi hamda Investitsiyalar va tashqi savdo vazirligi huzuridagi Xalqaro hamkorlik va rivojlanish agentligi bilan hamkorlikni yo‘lga qo‘yish, OTB tomonidan mazkur tuzilmalar faoliyatiga grant, texnik va maslahat yordami ko‘rsatish bilan bog‘liq masalalarga e'tibor qaratildi.

OTB rahbariyati BMT Bosh assambleyasining Orolbo‘yi mintaqasini “Ekologik innovatsiyalar va texnologiyalar zonasi” deb e'lon qilish to‘g‘risidagi rezolyutsiyasi doirasida Orolbo‘yida ekologik va iqlim loyihalarini amalga oshirish uchun moliyalashtirishni jalb etish imkoniyatlarini ko‘rib chiqishga tayyorligini bildirdi.