82 toifadagi tovarlar uchun import boji bekor qilindi

"Raqobatbardosh mahsulotlar ishlab chiqarishni yanada kengaytirish chora-tadbirlari to‘g‘risida" prezident qarori qabul qilindi.

Hujjatga asosan, 82 toifadagi xomashyo va yarimtayyor mahsulotlar importi 2024 yil 1 yanvargacha bojxona bojidan ozod etildi.

Tovarlar toifalari turlicha: kastor yog‘i, sun'iy mo‘yna, zig‘irpoya tolasidan to‘qilgan va sun'iy tolalardan tayyorlangan gazlamalar, shisha iplar, shisha tolali matolar, qog‘oz va karton, tayyor yelimlar va boshqalar.

Avvalroq, 31 dekabrgacha ayrim oziq-ovqat mahsulotlari, xususan go‘sht va kartoshka QQSdan ozod qilinayotgani ma'lum bo‘lgandi. Shuningdek, sitrus mevalar 2022 yil 1 maygacha bojxona bojidan ozod qilindi.