Qashqadaryoda MFY raislari tunda majlisga chaqirilgani aytildi

Ijtimoiy tarmoqlarda Qashqadaryo viloyati Yakkabog‘ tumanida MFY raislari tungi vaqtda majlisga chaqirilgani haqida xabarlar tarqaldi. Xabarlar bo‘yicha Mehnat vazirligi munosabat bildirdi.

Munosabatda ma'lum qilinishicha, ijtimoiy tarmoqlarda Yakkabog‘ tumanida MFY raislarining tunda majlisga chaqirilgani bo‘yicha Qashqadaryo viloyati Bandlik bosh boshqarmasi Davlat mehnat inspeksiyasi tomonidan o‘rganish o‘tkazilgan.

O‘rganish davomida, Davlat mehnat inspeksiyasi tomonidan holatga aloqador xodimlardan tushuntirish xatlari olinganda MFY raislariga rahbariyat tomonidan soliq yig‘ish bo‘yicha topshiriq bo‘lmaganini hamda yig‘ilish 17:30 da tugaganini bayon qilishgan.

«Yuqoridagilarga muvofiq, maqolada ko‘rsatib o‘tilgan vajlar o‘z tasdig‘ini topmadi. Shuningdek, ish beruvchilarga Mehnat kodeksining 7-, 157-moddasi talablariga rioya etish yuzasidan tegishli ko‘rsatmalar va tushuntirishlar berildi», deyiladi munosabatda.