Qashqadaryoda shifoxona xodimlari tibbiyot birlashmasi hovlisini tozalashda ishlatilgani aytildi

Ijtimoiy tarmoqda Qashqadaryo viloyati Yakkabog‘ tumanida shifoxona xodimlari tuman tibbiyot birlashmasi hovlisini tozalashda ishlatilgani aytilgan xabarlar tarqaldi. Mehnat vazirligi holat bo‘yicha munosabat bildirdi.

Ma'lum qilinishicha, Yakkabog‘ tumanida shifoxona xodimlari tuman tibbiyot birlashmasi hovlisini tozalashda ishlatilgani aytilgan xabarlar bo‘yicha Qashqadaryo viloyati Bandlik bosh boshqarmasi Davlat mehnat inspeksiyasi tomonidan o‘rganish o‘tkazilgan.

«O‘rganish davomida Davlat mehnat inspeksiyasi vakillari Yakkabog‘ tuman tibbiyot birlashmasi xodimlaridan tushuntirish xatlari olganda, ijtimoiy tarmoqlarda tarqalgan suratlar xabarga aloqador emasligi hamda xodimlarni obodonlashtirish ishlariga jalb qilish bo‘yicha rahbariyat tomonidan topshiriq bo‘lmaganligini bayon qilishdi. Yuqoridagilarga muvofiq, postda ko‘rsatib o‘tilgan vajlar o‘z tasdig‘ini topmadi», deyiladi munosabatda

Qayd etilishicha, ish beruvchilarga Mehnat kodeksining 7 va 157-moddasi talablariga rioya etish yuzasidan tegishli ko‘rsatma hamda tushuntirishlar berilgan.