Tojikiston xavfsizlik kengashi Afg‘oniston bilan chegarada terrorchilik xavfi kuchayganini bildirdi

Tojikiston chegarasida Afg‘oniston tomondan terrorchilik xavfi kuchaymoqda. Bu haqda Tojikiston xavfsizlik kengashi kotibi Nasrullo Mahmudzoda Dehlida bo‘lib o‘tayotgan Afg‘onistondagi xavfsizlik masalalariga bag‘ishlangan muloqotda ma'lum qildi.

“Afg‘on-tojik chegarasidagi vaziyat murakkabligicha qolmoqda va Afg‘oniston tomondan terrorchilik xavfi kuchaymoqda”, – dedi u.

Uning ta'kidlashicha, Tojikiston Afg‘onistondagi vaziyat borasida xavotirlanishi uchun asosli sabablarga ega.

“Mamlakatimiz Afg‘oniston bilan chegaradosh bo‘lgani holda dunyoga terrorizm, ekstremizm, giyohvandlik moddalari kontrabandasi va boshqa transmilliy jinoyatlarga qarshi kurashning oldingi safida turibdi”, – dedi Mahmudzoda.

Dehlida bo‘lib o‘tayotgan Afg‘onistondagi xavfsizlik masalalariga bag‘ishlangan muloqotda Hindiston, Eron, Qozog‘iston, Qirg‘iziston, Rossiya, Tojikiston, Turkmaniston va O‘zbekiston vakillari ishtirok etmoqda.