Koronavirusning yangi shtammi bois o‘ndan ortiq mamlakat Janubiy Afrikaga parvozlarni taqiqladi

Koronavirusning B.1.1.529 deb nomlangan yangi shtammi aniqlangani sababli qator davlatlar Janubiy Afrika mamlakatlariga parvozlarga cheklovlar joriy etishni boshladi, deb xabar berdi The Guardian.

30 noyabrdan Ispaniya Janubiy Afrika va Botsvanaga parvozlarni taqiqlaydi.

Filippin JAR, Botsvana, Namibiya, Zimbabve, Lesoto, Esvatini va Mozambikdan keladigan samolyotlarni qabul qilishni to‘xtatdi. Cheklov kamida 15 dekabrgacha amal qiladi. 

Bundan tashqari, Britaniya, Hindiston, Yaponiya, Italiya, Germaniya, Chexiya, Fransiya, Niderlandiya va Singapur ham Janubiy Afrika davlatlariga parvozlarga cheklovlar joriy etdi.

Shu bilan bir vaqtda, Belgiyada koronavirusning yangi shtammini yuqtirish bilan bog‘liq birinchi holat aniqlandi – bu Yevropada qayd etilgan ilk holat hisoblanadi. 

JAR rasmiylari ma'lumotiga ko‘ra, mamlakatda yangi variant bilan kasallanganlar soni 77 nafarni tashkil etmoqda. Shuningdek, Botsvanada to‘rt, Hongkongda bir kishida shu variant aniqlangan.