Urganchdagi 28-maktabda ta’til paytida mashg‘ulotlar o‘tilgan, o‘quvchilar kuniga 5 ming so‘mdan to‘lagan

12 yanvar kuni maktabda bir necha sinflarda o‘quvchilar to‘plangani, o‘qituvchilar tomonidan mashg‘ulot o‘tilayotgani guvohi bo‘ldik. Ba’zi sinflarda 1 nafar o‘quvchi o‘tirgan bo‘lsa, ba’zilarida o‘nlab o‘quvchilar to‘plangan. Ularning so‘ziga qaraganda, qo‘shimcha mashg‘ulotlar uchun kuniga 5 ming so‘mdan to‘lanmoqda, unda ishtirok etish ixtiyoriy.

Ismi-sharifi sir qolishini istagan ota-onalardan birining so‘zlariga ko‘ra, maktabda o‘zlashtirishi past bo‘lgan o‘quvchilar uchun kuniga 5 ming so‘mdan qo‘shimcha repetitorlik tashkil qilingan. Mashg‘ulotlar shu maktab o‘qituvchilari tomonidan o‘tkazilyapti.

«Har bir sinfda me’yordan ortiq ravishda 35-37 o‘quvchi ta’lim olyapti. Oqibatda bilim olishda orqada qolish kuchaymoqda, chunki o‘qituvchi har bir o‘quvchi bilan batafsil shug‘ullanishi uchun imkon qolmayapti. O‘zlashtirish darajasi pastligi sababi ham shunda», deb hisoblamoqda ota-onalardan biri.

Direktor Ilmira Kabulova maktab binosida qo‘shimcha mashg‘ulotlar o‘tkazilayotganidan bexabar ekanini, ammo bu mumkin emasligi haqida o‘qituvchilarni ogohlantirganini ma’lum qildi. 

«Qo‘shimcha mashg‘ulotlar o‘tkazilayotganidan bexabarman. Bu mumkin emasligi haqida o‘qituvchilarni 2 marta ogohlantirganman. 

Maktab binosida pullik repetitorlik ham mumkin emas. Agar pul evaziga qo‘shimcha mashg‘ulot o‘tkazishmoqchi bo‘lsa, shaxsiy tarzda, boshqa joyda shug‘ullanishlari mumkin. Bu o‘qituvchilarning shaxsiy ishi, bunda soliq idoralaridan ro‘yxatdan o‘tib, qo‘shimcha daromadlari haqida deklaratsiya to‘ldirishi kerak», - dedi Ilmira Kabulova.

Avvalroq, Xalq ta’limi vazirligi qishki ta’til kunlari tugagunga qadar o‘quvchilarni bevosita maktablardagi to‘garaklar va har qanday tadbirlarga jalb etish taqiqlanishi, o‘qituvchilar maktabda Milliy o‘quv dasturlari asosida malaka oshirish kurslarida qatnashishi haqida xabar bergan edi.

Nurmuhammad Said