«O‘zgidromet» Qamchiq dovonida kuchli yog‘ingarchilik bo‘lishidan ogohlantirdi

«O‘zgidromet» 19 yanvar kuni Qamchiq dovoni yo‘lida haydovchilar uchun noqulay ob-havo yuzaga kelishi mumkinligi sababli ogohlantirish bilan chiqdi.

Qayd etilishicha, shu kuni A-373 Toshkent—O‘sh avtomobil yo‘lining Qamchiq dovoni hududida qor ko‘rinishida yog‘ingarchilik, vaqti-vaqti bilan kuchli yog‘ingarchilik bo‘lishi, tuman tushib, ko‘rinuvchanlik 50 metrgacha pasayishi kutilmoqda.

Shuningdek, shamol tezligi sekundiga 17-22 metrgacha kuchayishi, yo‘lda yaxmalak va qor uyumlari yuzaga kelishi mumkin.

Avvalroq «O‘zgidromet» respublikaning tog‘li hududlarida 19 yanvargacha qor ko‘chishi xavfi mavjudligidan ogohlantirgandi.