Kattaqo‘rg‘onda tadbirkorlarga bosh pudratchilikni olib berishni va’da qilgan sobiq raisga jinoyat ishi qo‘zg‘atildi

Bosh prokuratura huzuridagi departamentning xabar berishicha, Kattaqo‘rg‘on shahar bo‘limi tomonidan tadbirkorlik sub’yektlarining huquqlarini himoya qilish yuzasidan tergovga qadar tekshiruv o‘tkazilgan.

Tekshiruvda aniqlanishicha, fuqaro B.M. O‘zbekiston iste’molchilar huquqlarini himoya qilish jamiyatlari Federatsiyasining Kattaqo‘rg‘on shahar jamiyati raisi vazifasini bajaruvchi bo‘lgan davrida qurilish sohasida faoliyat yurituvchi tadbirkorlarning ishonchiga kirib, ularga ijtimoiy obektlarda qurilish-ta’mirlash ishlari bo‘yicha bosh pudratchilikni olib berishni va’da qilgan.

So‘ng “B-K.” MChJ rahbarining 9 000, “U.B.” MChJ rahbarining 6 100 va “D.I.” MChJ rahbarining 3 000 dollarini qo‘lga kiritgan.

Qayd etilishicha, mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.