O‘zbekistonda umummilliy konstitutsiya imtihoni o‘tkaziladi

Vazirlar Mahkamasining “Jamiyatda huquqiy madaniyatni yuksaltirish bo‘yicha qo‘shimcha chora-tadbirlar to‘g‘risida”gi qarori loyihasi e’lon qilindi.

Quyidagilarni nazarda tutuvchi 2022-2023 yillarda jamiyatda huquqiy madaniyatni yuksaltirish bo‘yicha chora-tadbirlar dasturi tasdiqlanadi:

• shaxs, davlat va jamiyatning o‘zaro munosabatlarida aholining huquqiy madaniyatini yuksaltirish;
• jamiyatda huquqiy madaniyatni yuksaltirishda huquqiy targ‘ibotning innovatsion usullarini joriy qilish;
• aholining huquqiy madaniyatini yuksaltirishda ommaviy axborot vositalarining rolini kuchaytirish;
• yuridik ta’limni, shuningdek yuridik kadrlarni tayyorlash, qayta tayyorlash va ularning malakasini oshirish tizimini rivojlantirish;
• huquqiy madaniyatni yuksaltirishning ilmiy asoslarini tadqiq etish.

Adliya vazirligining fuqarolarning konstitutsiyaviy bilimlarini oshirishga bo‘lgan qiziqishlarini rag‘batlantirish maqsadida respublika miqyosidagi umummilliy konstitutsiya imtihonini o‘tkazish taklifi ma’qullanadi.

2022 yil 1 sentyabrga qadar Adliya vazirligi Axborot texnologiyalari va kommunikatsiyalarini rivojlantirish vazirligi bilan birgalikda umummilliy konstitutsiya imtihonini o‘tkazish uchun mavjud platformani quyidagilarni inobatga olgan holda modernizatsiya qiladi:

• platformada fuqarolarning yosh darajalari bo‘yicha o‘zbek va rus tillarida (zarurat bo‘lganida boshqa tillarda ham) test sinovlarini ishlash imkoniyatini yaratish;
• oliy va o‘rta-maxsus yuridik ma’lumotli shaxslar uchun alohida test sinovlarini kiritish;
• har bir yo‘nalishlar bo‘yicha reytinglarni avtomatik hisoblash tizimini ishga tushirish;
• platforma foydalanuvchilarini jismoniy shaxsning shaxsiy identifikatsiya raqami orqali identifikatsiya qilish imkoniyatini yaratish;
• platformaning mobil ilovasini ishlab chiqish.

2023 yil 1 dekabrga qadar aholining barcha qatlami uchun mo‘ljallangan «Yuridik kutubxona» elektron tizimi va uning mobil ilovasi ishga tushiriladi.