Rossiyada ishlayotgan o‘zbekistonliklarning 5 million rubl ish haqi undirib berildi

Rossiyaning «Stroyservis» va «Koch Konstrakshn» korxonalarida vaqtinchalik mehnat faoliyatini amalga oshirayotgan 152 nafar o‘zbekistonlik mehnat migrantlari oylik ish haqini undirib berishni so‘rab Tashqi mehnat migratsiyasi agentligining Moskva shahridagi vakolatxonasiga murojaat qilgan.

Vakolatxona xodimlari tomonidan fuqarolarga huquqiy yordam berish maqsadida ular yashab turgan xostelga borilib, yuzaga kelgan muammo o‘rganildi. Muammoni hal etish maqsadida Rossiya prokuraturasi, Tergov qo‘mitasi va politsiya xodimlariga murojaat qilindi.

Rossiya huquq tartibot idoralari hamkorligida fuqarolarning bir oylik maoshlari, ya’ni 5 million rubl undirib berilgan.

Ta’kidlanishicha, ayni paytda mazkur ish beruvchilarga nisbatan jinoyat ishi ochilgan va Tergov qo‘mitasi tomonidan jinoyat ishi ko‘rib chiqilmoqda.