Prokuratura Nukusda hamshiralar uylarni oqlashga jalb qilingani yuzasidan tekshiruv boshladi

Bir necha kun oldin Kun.uz saytida Nukusda hamshiralar uylarni oqlash ishlariga jalb qilingani haqida xabar berilgandi. Unda Oilaviy poliklinika hamshiralari sovuq va namgarchilikda aholi uylarini oqlashga majburlangani aytilgandi.

Qoraqalpog‘iston SSV Kun.uz savoliga javoban hamshiralar devor oqlashga emas, aholiga “uyini oqlash bo‘yicha tavsiyalar berish”ga chiqarilganini ma’lum qildi. Qoraqalpog‘iston Respublikasi prokuraturasi holat yuzasidan rasmiy munosabat bildirdi.

Qayd etilishicha, vaziyat yuzasidan Qoraqalpog‘iston Respublikasi prokuraturasi tomonidan tegishli mutaxassislar bilan birgalikda tekshirish ishlari o‘tkazilmoqda.

Qoraqalpog‘iston prokuraturasi holat to‘liq o‘rganilib, natijasi haqida batafsil ma’lumot berilishini qo‘shimcha qilgan.

Bundan oldin ushbu voqea ortidan Qoraqalpog‘iston Respublikasi Sog‘liqni saqlash vazirligi va O‘zbekiston mehnat vazirligi ham o‘z tekshiruvlarini boshlaganini ma’lum qilgandi.