Kadastr agentligiga yangi direktor tayinlandi

Farrux Po‘latov Davlat soliq qo‘mitasi huzuridagi Kadastr agentligi direktori lavozimiga tayinlandi. Bu haqda Nigoh Telegram kanali xabar bermoqda.

Shu kunga qadar u «O‘zdonmahsulot» aksiyadorlik kompaniyasi boshqaruvi raisi sifatida faoliyat yuritgan.

Avvalroq, Kadastr agentligi sobiq direktori Fazliddin Umarovning Samarqand shahrining hokimi etib tayinlangani xabar qilingandi.

Ma’lumot uchun, 1979 yilda tug‘ilgan Farrux Po‘latov «O‘zdonmahsulot» raisi lavozimiga kelgunga qadar Bosh prokuratura huzuridagi Soliq, valutaga oid jinoyatlarga va jinoiy daromadlarni legallashtirishga qarshi kurashish departamenti (hozirgi Iqtisodiy jinoyatlarga qarshi kurashish departamenti) Farg‘ona boshqarmasi boshlig‘i lavozimida ishlagan. Shuningdek, Farg‘ona va Namangan viloyatlari prokuratura organlarida turli lavozimlarda faoliyat yuritgan.