Shavkat Mirziyoyev DXMlarda ko‘rsatiladigan davlat xizmatlari sonini 300 taga yetkazish vazifasini qo‘ydi

Prezident matbuot kotibi xabariga ko‘ra, Shavkat Mirziyoyev raisligida 7 aprel kuni o‘tkazilgan videoselektor yig‘ilishida davlat xizmatlari markazlarini qurish ishlariga shaxsan viloyat hokimlari mas’ul etib belgilangan bo‘lsa-da, hozirga qadar 43 ta markaz binosi foydalanishga topshirilmagani, oqibatda aholi sarson bo‘layotgani tanqid qilindi.

Davlatobod, Yangiyer, Guliston, Bo‘ka, Mirobod, Sergeli va Mirzo Ulug‘bek tumanlari, Guliston va Olmaliq shaharlarida qurilish ishlari umuman boshlanmagan, Nukus shahri, Boyovut, Quyi Chirchiq va Pskent tumanlarida esa qurilish ishlari to‘xtab qolgan. Viloyat hokimlariga 1 sentabrga qadar davlat xizmatlari markazlari bilan bog‘liq barcha qurilishlarni yakunlash topshirildi.

Davlat xizmatlari tizimini raqamlashtirish orqali mahalla va tumanda qanday o‘zgarishlar bo‘lishi ko‘rib chiqildi. Aholiga davlat xizmatlaridan foydalanishda qulaylik yaratish maqsadida 1 iyuldan boshlab:

• 38 turdagi davlat xizmatlari uchun elektron imzo bilan tasdiqlash talabi bekor qilinib, mobil telefon orqali amalga oshiriladi (bino va inshootning tashqi ko‘rinishini o‘zgartirishni kelishish, bog‘chaga qabul qilish va hokazo);
• 6 turdagi litsenziya olish uchun talablar bekor qilinadi;
• aholi va tadbirkorlar uchun 8 dan ortiq davlat xizmati bo‘yicha elektron xabardor qilish tizimi joriy etiladi;
• aholi va tadbirkorlardan kommunal tashkilotlarning 32 turdagi hujjat va ma’lumotnomalarini talab qilish bekor qilinadi;
• ehtiyojmand oilalar farzandlari oliygohlarga kirishda test sinovlarida ishtirok etish to‘lovlaridan ozod etiladi (135 ming so‘m).