Buyuk Britaniya Rossiyadan temir va po‘lat import qilishni taqiqlaydi 

Buyuk Britaniya 14 apreldan Rossiyadan temir va po‘lat import qilishni taqiqlaydi. Bu haqda Britaniya hukumati matbuot xizmati ma’lum qildi.

«Ertadan boshlab Rossiya temiri va po‘lati importini taqiqlaymiz», — dedi Buyuk Britaniya tashqi ishlar vaziri Liz Trass.

Qayd etilishicha, 14 aprel kuni tegishli qonunosti hujjati ko‘rib chiqish uchun Britaniya parlamentiga taqdim etiladi.

Hujjatda shuningdek, Rossiyaga «kvant texnologiyalari, zamonaviy materiallar, hashamatli buyumlar» eksportini taqiqlash ko‘zda tutilgan.

15 mart kuni Yevroittifoq Rossiyadan po‘lat va temirdan tayyorlangan mahsulotlar importini taqiqlagandi.