Xitoyda barcha davlat organlari va kompaniyalaridagi import kompyuterlar mahalliy kompyuterlarga almashtiriladi

Xitoyning bu qarori AQShning HP va Dell kompaniyalari savdosiga bevosita ta’sir ko‘rsatadi.

Foto: Dreamstime/TNS

Xitoy hukumati davlat organlari va korporatsiyalaridan ikki yil ichida import kompyuterlarni mahalliy ishlab chiqaruvchilar mahsulotlariga almashtirishni talab qildi. Bu haqda Bloomberg o‘z manbalariga tayanib xabar berdi.

Xodimlardan xorijda ishlab chiqarilgan kompyuterlarni topshirish so‘ralgan. Ularning o‘rniga Xitoyda ishlab chiqarilgan, mahalliy operatsion tizimda ishlaydigan kompyuterlar beriladi, degan manbalar. Qayd etilishicha, birgina mahalliy hukumat miqyosida 50 millionga yaqin kompyuterni almashtirishga to‘g‘ri keladi.

Xitoyning bu qarori AQShning HP va Dell kompaniyalari savdosiga bevosita ta’sir ko‘rsatadi. Ular Xitoy bozorida sotuvlar bo‘yicha mahalliy Lenovo kompaniyasidan keyingi o‘rinlarda turadi.

Ushbu xabardan so‘ng Lenovo va Xitoyning boshqa texnologik kompaniyalari aksiyalari narxi ko‘tarilgan.