44ta davlat mulki obekti madaniyat va san’at sohasida davlat-xususiy sheriklik asosida beriladi

Madaniyat va san’at sohasida davlat-xususiy sheriklik asosida beriladigan davlat mulki obektlari ro‘yxati tasdiqlanadi.

Madaniyat vazirligi tomonidan 2019-2020 yillar davomida 10ta (qiymati 50 mlrd so‘mdan ortiq bo‘lgan) madaniyat muassasalari davlat-xususiy sheriklik asosida tadbirkorlik sub’yektlariga berilgan.

Belgilab qo‘yilishicha:

Madaniyat vazirligi tomonidan tadbirkorlik sub’yektlari bilan tuzilgan va bitim tuzish jarayonida bo‘lgan davlat-xususiy sheriklik loyiha bitimlari o‘rnatilgan tartibda mahalliy ijro etuvchi hokimliklarga topshiriladi hamda davlat sherigi mahalliy ijro etuvchi hokimliklar deb talqin qilinadi;

mahalliy ijro etuvchi hokimliklar madaniyat va san’at muassasalarida davlat-xususiy sheriklik loyihalari bo‘yicha belgilangan vazifalar o‘rnatilgan tartibda amalga oshirilishini nazorat qiladi hamda loyihalarni amalga oshirishda shaxsan mas’ul ekanligi belgilanadi.

Qoraqalpog‘iston Vazirlar Kengashi, viloyatlar va Toshkent shahar hokimliklari:

har yili 1 fevralga qadar davlat-xususiy sheriklik shartlarida madaniyat va san’at muassasalarining binolarini qurish uchun bepul asosda doimiy foydalanishga ajratilishi mumkin bo‘lgan yer uchastkalarini aniqlab, ularning tasdiqlangan ro‘yxatlarini Madaniyat vazirligiga taqdim etadi;

davlat-xususiy sheriklik asosida madaniyat va san’at muassasalarini qurilishi belgilangan hududlarda barcha zarur tashqi muhandislik-kommunikatsiya infratuzilmasi (elektr energiyasi, gaz ta’minoti, suv ta’minoti, kanalizatsiya, avtomobil yo‘llari va boshqalar) bilan ta’minlaydi.