Sirdaryo viloyati hokimiga yangi o‘rinbosar tayinlandi

Sirdaryo viloyati hokimligi axborot xizmatining xabar berishicha, bugun, 2022 yil 14 iyun kuni viloyat hokimi G‘ofurjon Mirzayev, sektorlar rahbarlari, viloyat korxona va tashkilotlari mutasaddilari ishtirokida yig‘ilish bo‘lib o‘tgan.

Yig‘ilishda Vohid Ibodullayev – viloyat hokimining kapital qurilish, kommunikatsiyalar va kommunal xo‘jalik masalalari bo‘yicha o‘rinbosari lavozimiga tayinlanganligi e’lon qilingan.

V.Ibodullayev 1979 yilda Samarqand viloyatining Paxtachi tumanida tug‘ilgan. Buxoro oziq-ovqat va yengil sanoat texnologiyalari instituti va Toshkent arxitektura va qurilish institutini tamomlagan.

Mazkur tayinlovgacha V.Ibodullayev Qurilish vazirligi Ichki audit va komplayens-nazorat boshqarmasi boshlig‘i vazifasida faoliyat yuritgan.

Avvalroq, Kitob tumaniga yangi hokim tayinlangani haqida xabar berilgandi.