O‘zbekistonda Rossiya IIV «Pasport-viza xizmati» korxonasi vakolatxonasi akkreditatsiyadan o‘tkazildi

Uchrashuvda Rossiya Ichki ishlar vazirligi «Pasport-viza xizmati» federal davlat unitar korxonasi vakiliga ushbu tashkilot TIV huzurida rasmiy akkreditatsiyadan o‘tgani haqidagi sertifikat topshirildi.

Oleg Kostyuk akkreditatsiyadan o‘tkazilganlik uchun minnatdorlik bildirib, vakolatxona nafaqat o‘zbekistonlik mehnat muhojirlarini uyushgan ravishda jalb qilish bo‘yicha «pilot loyiha» doirasida faol ishtirok etish, balki fuqarolar uchun turli xizmatlar, xususan, konsalting va axborot xizmatlarini ko‘rsatishni tashkil etish niyatida ekanini ta’kidladi.

Rossiya Ichki ishlar vazirligi «Pasport-viza xizmati» davlat unitar korxonasi asosiy faoliyati jismoniy va yuridik shaxslarga migratsiya sohasida axborot va konsalting xizmatlarini ko‘rsatish, shuningdek, Ichki ishlar vazirligiga taqdim etilgan arizalar va boshqa hujjatlarni qayta ishlash bo‘yicha xizmatlarni taqdim etadigan yagona tuzilmadir.

Ayni paytda O‘zbekiston Bandlik va mehnat munosabatlari vazirligi Rossiya Ichki ishlar vazirligi «Pasport-viza xizmati» federal davlat unitar korxonasi bilan mamlakatdan Rossiyaga 10 ming quruvchini ishga jalb qilish bo‘yicha «pilot loyiha» doirasida hamkorlik qilmoqda.

«Pilot loyiha» mehnat migrantlari Rossiyaga kirish mexanizmini optimallashtirish, ish beruvchilar bildirgan ehtiyojlarni hisobga olgan holda mutaxassislar malakasini oshirish, shuningdek, fuqarolar Rossiya hududiga borishi uchun zarur bo‘lgan protseduralarni o‘tkazishga qaratilgan. Barcha zarur tibbiy va huquqiy protseduralar, jalb etilgan o‘zbekistonlik mutaxassislar malaka tekshiruvlari Toshkentda amalga oshiriladi.