Taksichilar uchun xushxabar: Kirakashlik o‘z-o‘zini band qiluvchi kasblar ro‘yxatiga qo‘shiladi

1 sentabrdan e’tiboran jismoniy shaxslar o‘zini o‘zi band qilgan kirakash sifatida ro‘yxatdan o‘tib, yengil avtomobilda qonuniy ravishda yo‘lovchi tashishi mumkin bo‘ladi.

Foto: Kun.uz

2022 yil 1 sentabrdan 2024 yil oxiriga qadar yo‘lovchilarni yengil avtotransport vositalarida tashish faoliyati o‘zini o‘zi band qilgan shaxslar shug‘ullanishi mumkin bo‘lgan faoliyat turlari ro‘yxatiga kiritiladi.

Bu haqdagi prezident qaroriga asosan, 4 tadan ko‘p bo‘lmagan o‘rindiqlarga ega transportlarda yo‘lovchi tashish o‘zini o‘zi band qilish deb qaraladi va bu faoliyat litsenziya varaqasi asosida amalga oshiriladi.

Bundan tashqari:

litsenziya varaqasini berishda avtomobilning 10 yillik ekspluatatsiya davriga qo‘yilgan talab bekor qilinadi;
majburiy tibbiy va texnik ko‘rik muddati 1 yilda 1 marta qilib belgilanadi;
o‘zini o‘zi band qilgan tashuvchilardan, shu jumladan yuridik shaxslardan litsenziya varaqasi berilganligi uchun davlat boji miqdori 300 ming so‘m etib belgilanadi.

“Davlatimiz rahbari avval aytganidek, joylardan tushgan asoslangan takliflar va yechimlar bo‘yicha doimiy tarzda xalqimizning foydasiga xizmat qiladigan qarorlar qabul qilib boriladi”, deya qarorga izoh berdi prezidentning matbuot kotibi Sherzod Asadov.

Endi avtomobilga ishonchnoma rasmiylashtirish uchun notariusga borish shart bo‘lmaydi