Sanoat xavfsizligi qo‘mitasi nazoratidagi korxonalarda sodir bo‘lgan 42 ta baxtsiz hodisaning 13 tasi o‘lim bilan tugadi

Sanoat, radiatsiya xavfsizligi talablari va yerosti boyliklaridan foydalanish sohalarida 27 010 ta qoidabuzilish aniqlandi. Bu haqda AOKAda Sanoat xavfsizligi davlat qo‘mitasi rahbariyati ishtirokida o‘tkazilgan matbuot anjumanida ma’lum qilindi.

Qayd etilishicha, 22 ta korxonada ishlar vaqtincha to‘xtatib qo‘yilgan. 1 521 ta injyener-texnik va rahbar xodimlarga 1 mlrd 186 mln 598 000 so‘m miqdorida jarimalar qo‘llanilgan.

Sanoat xavfsizligi davlat qo‘mitasi nazorati ostidagi korxona va tashkilotlarda umumiy 42 ta baxtsiz hodisa sodir bo‘lib, bulardan 13 tasi o‘lim bilan tugadi.

Hududlardagi mavjud jami 143 ta madaniyat va istirohat bog‘ida o‘rnatilgan 1879 ta attraksion ko‘zdan kechirilgan va ulardan xavfsiz foydalanish talablariga rioya etish holati o‘rganib chiqilgan.

Ma’lum qilinishicha, 574 ta attraksion faoliyati vaqtinchalik to‘xtatilgan.