Roskomnadzor qidiruv tizimlariga Wikimedia’ni qonunbuzar deb belgilab qo‘yishni buyurdi

«Vikipediya» Rossiyada allaqachon 5 million rubl jarimaga tortilgan, ammo Roskomnadzor talab qilganidek, maqolalarni olib tashlamagan. Endi qidiruv tizimlari Wikimedia Foundation Rossiya qonunlarini buzayotgani haqida xabar berishi kerak bo‘ladi.

Foto: Eric Risberg / AP

«Vikipediya» Rossiya hukumati «Ukrainadagi urush haqidagi feyklar» deb baholagan bir qator materiallarni o‘chirishdan bosh tortgani sababli Roskomnadzor (RKN) qidiruv tizimlariga onlayn ensiklopediya ishini qo‘llab-quvvatlovchi Wikimedia Foundation’ni Rossiyada qonunbuzar deb belgilashni buyurdi. Bu haqda idoraning 20 iyul, chorshanba kuni chop etilgan xabarida aytiladi.

«Wikipedia internet-resursida (Wikimedia Foundation, Inc.’ga tegishli) taqiqlangan deb tan olingan bir qator materiallar, jumladan, Ukraina hududida maxsus harbiy operatsiya o‘tkazilayotgani haqidagi feyklar o‘chirilmagan», — deyiladi Roskomnadzor ma’lumotida.

Xabarda qayd etilishicha, internet-kompaniyaga nisbatan ko‘rilgan choralar Rossiya qonunchiligi buzilishi to‘liq bartaraf etilmaguncha o‘z kuchida qoladi.

Rossiyada Wikimedia Foundation «noqonuniy ma’lumotni» olib tashlamagani uchun bir necha bor ma’muriy javobgarlikka tortilgan, kompaniyaga jami 5 million rubl miqdorida jarima belgilangan. 3 million rubl miqdoridagi jarimalardan biriga Ukrainadagi harbiy amaliyotlar haqida «noto‘g‘ri ma’lumot» berilgan yettita maqola e’lon qilingani sabab bo‘ldi. Bundan tashqari, sud Wikimedia’ni portlovchi moddalar - porox ishlab chiqarish haqidagi ikkita maqola uchun 2 million rubl miqdorida jarimaga tortdi.