Uzbekistan Airports Toshkent aeroportida ijaraga beriladigan maydonlarni auksionga qo‘ydi

Ular orasida umumiy ovqatlanish va chakana savdo shoxobchalari, savdo avtomatlari va taksi xizmatlari uchun joylar mavjud. Ijara maydonlarining aksariyati hozirda rekonstruksiya qilinayotgan uchib ketish zalining chap tomonida joylashgan.

Hozirda auksion uchun o‘nta lot qo‘yilgan. Uchib ketish zali va pochta-yuk kompleksida savdo avtomatlarini joylashtirish uchun joy ijaraga beriladi. 2 kvadrat metr maydonga uchta savdo avtomati (qahva/sneklar/ichimliklar) joylashtiriladi. Lot boshlang‘ich summasi - yiliga 28,8 mln.

Umumiy ovqatlanish punktini tashkil qilish uchun aeroport uchta joyni taklif etadi - ikkitasi jo‘nash terminalining «steril» zonasida va bittasi estakada ostidagi maydon - hozirgi JUM kafesi. Kafe-bar uchun uchib ketish zalida 25 kvadrat metr va 80 kvadrat metr maydonlar, to‘liq oshxona tashkil qilish imkoniyatisiz, ijaraga beriladi. 

O‘rnatilgan talablarga muvofiq, ijarachi kompaniya umumiy ovqatlanish sohasida tajribaga ega bo‘lishi, taniqli brendga ega bo‘lishi va TripAdvisor ma’lumotlariga ko‘ra Toshkentdagi eng yaxshi 10 ta umumiy ovqatlanish brendlari qatorida bo‘lishi lozim. Birinchi joyda bir kvadrat metrning boshlang‘ich qiymati 785 ming so‘m, ikkinchi joyda 390 ming so‘mni tashkil etadi. 

Uzoq yillardan buyon JUM brendi ostida faoliyat yuritib kelayotgan kafe uchun ijarachi qidirilmoqda. Restoranda to‘liq faoliyat olib boruvchi oshxona mavjud. Umumiy maydoni 217 kvadrat metr bo‘lgan obektning yillik boshlang‘ich qiymati 586,5 million so‘mni tashkil etadi.

Chakana savdo uchun Toshkent aeroportida, kitob do‘konini tashkil etish uchun – yillik boshlang‘ich qiymati 47,5 mln so‘m bo‘lgan 12 kvadrat metr maydon, esdalik sovg‘alari va gastronomik mahsulotlar do‘koni uchun – yillik boshlang‘ich qiymati 226 mln so‘m bo‘lgan 24 kvadrat metr ochiq maydon, gadjetlar va aksessuarlar do‘koni uchun – yillik boshlang‘ich qiymati 158,4 mln so‘m bo‘lgan 24 kvadrat metr ochiq maydon va zargarlik buyumlari do‘koni uchun – yillik qiymati 226 mln so‘m bo‘lgan 24 kvadrat metr ochiq maydon bor.

Uchib kelish zalida taksi xizmati uchun peshtaxta va ofis xonasi ham savdoga qo‘yilgan. Ariza beruvchi kompaniya uch yildan ortiq bo‘lmagan benzinli avtomashinalar parkiga, kamida uch yillik tajribaga ega bo‘lgan haydovchilar tarkibiga ega bo‘lishi kerak. Terminal oldidagi birinchi qatorda har doim kamida beshta mashina bo‘lishi lozim. Lotning yillik boshlang‘ich bahosi – 188,82 mln so‘m.