Belarus O‘zbekistonda elektrotexnika sohasida qo‘shma loyihalarni amalga oshiradi

O‘zbekiston hukumati delegatsiyasining Belarusga tashrifi chog‘ida Minsk shahrida bosh vazir o‘rinbosari - investitsiyalar va tashqi savdo vaziri Jamshid Xo‘jayev va Belarus taraqqiyot banki hamda «Beleksimgarant» va «Promagrolizing» agentliklari rahbariyati o‘rtasida muzokaralar bo‘lib o‘tdi.

Uchrashuvda Belarus moliya institutlarining mashinasozlik, elektrotexnika, farmatsevtika va qishloq xo‘jaligi sohasidagi qo‘shma loyihalarni amalga oshirishdagi ishtiroki muhokama qilindi.

Belarus taraqqiyot banki O‘zbekiston banklari bilan ishlash bo‘yicha to‘plangan tajriba hamda savdo va investitsiya loyihalarini moliyalashtirish resurslaridan foydalanib, O‘zbekiston bilan qo‘shma tashabbuslarni moliyalashtirishda ishtirok etishdan manfaatdor ekanini bildirdi.

Taraqqiyot banki rahbariyati, «Beleksimgarant» va «Promagrolizing» agentliklarining sentabr oyida O‘zbekiston tegishli vazirlik va idoralarida istiqbolli loyihalarni o‘rganish va muzokaralar olib borish uchun Toshkentga tashrifini tashkil etish masalasi kelishib olindi.

O‘zaro hisob-kitoblarni amalga oshirishning nisbiy va prognoz qilinadigan barqarorligi sharoitida banklararo hamkorlikni davom ettirish muhokama qilindi.