Respublika agrokimyoviy tahlil markazi 1 mln dollarlik uskunalar bilan jihozlanadi

Prezidentning “Mahalliy mahsulotlarni xalqaro talablarga muvofiqlashtirish bo‘yicha qo‘shimcha chora-tadbirlar to‘g‘risida”gi qarori loyihasi e’lon qilindi. 

Qishloq xo‘jaligi vazirligi O‘simliklar karantini agentligi bilan birgalikda Xalqaro tiklanish va taraqqiyot banki hamda Xalqaro taraqqiyot uyushmasi ishtirokida amalga oshirilayotgan:

“O‘zbekiston qishloq xo‘jaligini modernizatsiya qilish” loyihasiga ajratilgan mablag‘lar hisobidan respublika agrokimyoviy tahlil markazini 1 mln AQSh dollari qiymatiga teng asbob-uskunalar bilan jihozlash choralarini ko‘radi;

“O‘zbekistonda meva-sabzavotchilik tarmog‘ini rivojlantirish” loyihasi iqtisod qilingan mablag‘lari hisobidan respublika agrokimyoviy tahlil markazi 13 ta hududiy filialini 11,4 mln AQSh dollari qiymatiga teng zamonaviy laboratoriya asbob-uskuna va jihozlar bilan ta’minlaydi.

Veterinariya qo‘mitasi 2022 yil 1 noyabrga qadar laboratoriya tekshiruvlari yagona elektron ma’lumotlar bazasi axborot tizimini ishga tushiradi.

Sanitariya-epidemiologik va jamoat salomatligi xizmati manfaatdor vazirlik va idoralar bilan birgalikda:

a) bir oy muddatda eksportchi korxonalarni qo‘llab-quvvatlash va eksport salohiyatini oshirishga doir chora-tadbirlarni amalga oshirish bo‘yicha Sanitariya-epidemiologik osoyishtalik va jamoat salomatligi xizmati markaziy va quyi bo‘g‘in faoliyatini yo‘lga qo‘yadi;

b) 2023 yil 1 yanvarga qadar:

“Oziq-ovqat mahsuloti sifati va xavfsizligi to‘g‘risida”gi qonuni loyihasi yangi tahriri va “Oziq-ovqat mahsuloti xavfsizligi to‘g‘risida”gi texnik reglament loyihasini Vazirlar Mahkamasiga kiritadi;

Toshkent shahrida – 2 ta, Qoraqalpog‘iston Respublikasi va Namangan viloyatida – 1 tadan laboratoriya majmualarini xalqaro akkreditatsiyadan o‘tkazish choralarini ko‘radi;

v) 2024 yil 1 yanvarga qadar respublika bo‘yicha 10 ta laboratoriya majmualarini xalqaro akkreditatsiyadan o‘tkazish choralarini ko‘radi;

g) 2022 yil 30 oktyabrga qadar Sanitariya-epidemiologik va jamoat salomatligi xizmati bazasida kadrlarning kasbiy malakasini oshirish va qayta tayyorlash markazini tashkil etish bo‘yicha normativ-huquqiy hujjat loyihasini ishlab chiqib, Vazirlar Mahkamasiga kiritadi.