Kanadada 10 kishini o‘ldirganlikda gumonlanayotgan shaxs ushlandi

Kanada politsiyasi 7 sentabr, chorshanba kuni joriy yilning 4 sentabr kuni sodir bo‘lgan bir qator qotilliklar bo‘yicha yagona tirik gumondorni qo‘lga oldi. Kanadaning markaziy qismidagi Saskachevan provinsiyasida joylashgan Rostern shahri yaqinida 30 yoshlardagi erkak qo‘lga olindi. Tergov ma’lumotlariga ko‘ra, u akasi bilan 13 xil joyda, jumladan, Jyeyms-Smit-Kri-Fyorst-Neyshn rezervatsiyasida va Veldon qishlog‘ida jinoyat sodir etgan. Hammasi bo‘lib 10 nafar mahalliy aholi halok bo‘lgan, 18 nafari pichoqlangan.

Gumonlanuvchining akasi jasadi 5 sentabr kuni topilgan bo‘lib, unda jarohatlar izlari bo‘lgan. Politsiyaning fikricha, u bu jarohatlarni o‘ziga o‘zi yetkazmagan. 

Qo‘lga olingan shaxs huquq-tartibot idoralariga 20 yildan beri tanish. Voyaga yetganidan so‘ng 59 ta huquqbuzarlik, jumladan, o‘g‘rilik va zo‘ravonlik sodir etgan. O‘smirlik davridan beri u spirtli ichimliklar va giyohvand moddalar bilan bog‘liq muammolarga duch kelgan. 14 yoshida kokain iste’mol qila boshlagan.