Polshada aholiga nurlanishga qarshi dori tarqatiladi

Polsha ichki ishlar vazirligi fuqaro himoyasi doirasida aholiga kaliy yodid tarqatilishini xabar qildi. 

Xabarda aytilishicha, Rossiya qurolli kuchlari nazorati ostidagi Zaporijjya AESidan kelib chiqishi mumkin bo‘lgan xatardan himoya qilish maqsadida ushbu qaror qabul qilingan. 

«Zaporijjya AESi hududida jangovar harakatlar borayotgani to‘g‘risidagi xabarlar munosabati bilan inqirozga qarshi choralar va fuqarolar himoyasi doirasida davlat qutqaruv xizmatining rayon bo‘limlariga kaliy yodid tabletkalari berildi», - deyiladi xabarda.

Qayd etilishicha, bu radiatsion xatar kelib chiqishi ehtimoli uchun ko‘zda tutilgan standart jarayon hisoblanadi.

Vazirlikning ta’kidlashicha, hozirda bunday xatar yo‘q va vaziyat mamlakat atom energiyasi agentligi tomonidan muntazam monitoring qilinmoqda.