Haj va umra kvotalari oshadi, viza olish osonlashadi - Saudiya haj vaziri tashrifi tafsilotlari

{Yii::t(}

O'tkazib yuborish 6s

O'tkazib yuborish

Xo‘sh, haj va umra vaziri O‘zbekistonga nima uchun keldi? Tashrifdan qanday yangilik va yengilliklar kutilyapti?

Tashrifning ilk kuni Toshkentdagi «Simpoziumlar saroyi»da Tavfiq bin Favzon ar-Robia bilan Din ishlari bo‘yicha qo‘mita raisi Sodiqjon Toshboyev va muftiy Nuriddin Xoliqnazarov ishtirokida muloqot bo‘lib o‘tdi.

Uchrashuvda Imom Buxoriy yod etilgan, joriy yilda Haj ziyoratchilari 12 mingdan, umra qiluvchilar soni 40 ming nafardan oshgani e’tirof qilingan.

Rasmiy xabarga ko‘ra, asosiy mulohazalar o‘zbekistonlik ziyoratchilar uchun xizmat ko‘rsatish sifatini oshirish, hamkorlik va Saudiya fuqarolarini O‘zbekistonning qadimiy shaharlariga ziyoratlarini tashkil etish bo‘yicha takliflar borasida bo‘lgan.

Shuningdek, muloqotda Saudiya Arabistoni Haj va umra vazirligi va Din ishlari bo‘yicha qo‘mita o‘rtasida memorandum tuzish masalasi ko‘rib chiqilgan.

Bugun, 29 sentabr kuni esa Toshkentda sayyohlik agentliklari uchun ziyoratchilar sayohatini osonlashtirishga mo‘ljallangan integratsiyalashgan raqamli platforma – Nusuk'ning taqdimoti bo‘lib o‘tdi.

Nusuk nima? Ushbu platforma yordamida butun dunyo bo‘ylab ziyoratchilar va boshqa sayyohlar ham elektron vizaga murojaat qilishi, mehmonxonalar va reyslarni bron qilishgacha bo‘lgan barcha tashriflarini bemalol tashkil qilishi mumkin. Ya’ni siz mustaqil ravishda veb-sayt yoki mobil dastur orqali visa-biletlarni olib, Saudiyadan mehmonxona, muqaddas joylarga navbat bilan kirish kabilarni band qila olasiz.

Saudiya Arabistonining raqamlashtirish strategiyasi asosida amalga oshirilayotgan bu dasturdan, afsuski, hozircha o‘zbekistonliklar mustaqil foydalana olmaydi. Chunki O‘zbekiston hozircha Saudiya tomonidan elektron viza olish mumkin bo‘lgan davlatlar qatoriga kirmagan. O‘zbekistonliklar bu dastur orqali baribir sayyohlik firmasiga murojaat qilib, turistik to‘plam sotib olishi va ular orqali viza olishi kerak bo‘ladi.

Bu boradagi savolimizga javoban Saudiya haj va umra vaziri O‘zbekistonni ham bu ro‘yxatga kiritish masalasi o‘rganilayotganini, hozirgi imkoniyat tur paket sotib olish orqali ekanini ma’lum qildi.

Albatta, biz ham umid qilamiz, o‘zbekistonliklar ham Nusuk raqamli platformasidan tez orada to‘laqonli foydalanish imkoniga ega bo‘ladi.

Xususiy sayyohlik firmasi rahbari Sherzod Samig‘jonovning tushuntirishicha, bu platforma orqali Makka va Madinadan tashqari boshqa shaharlarda ham sayyohlik yo‘nalishlari rivojlantiriladi, shuningdek raqamlashtirish jarayonlari kengaytirib boriladi.

«Bu platforma takomillashtirib borilmoqda. Nusuk orqali har bir ziyoratchi mustaqil ziyoratni amalga oshirishi reja qilingan. Lekin hozircha O‘zbekiston fuqarolari onlayn turistik viza ololmaydi, keyinchalik bizga ham bunday imkoniyat berilishi ko‘zda tutilgan. Hozircha o‘zbekistonliklar sayyohlik firmalari orqali umra viza olishi arzonroq va qulay.

Keyinchalik raqamlashtirish jarayonlari kengaytirilib, hajga borish uchun ham onlayn xizmatlar yaratilishi nazarda tutilmoqda», – deydi Sherzod Samig‘jonov.

Bundan tashqari, bugunning o‘zida O‘zbekiston prezidenti Shavkat Mirziyoyev Saudiya Arabistoni Haj va umra ishlari vaziri Tavfiq bin Favzon ar-Rabiya boshchiligidagi delegatsiyani qabul qildi.

Uchrashuvda O‘zbekiston fuqarolari uchun yillik Haj kvotasi ikki barobar – 24 ming nafargacha, umra kvotasi esa 100 ming nafargacha oshirilishiga doir kelishuvga erishildi.