Shavkat Mirziyoyevning Vengriyaga tashrifi doirasida qishloq xo‘jaligiga oid katta hujjatlar to‘plami imzolanadi

Prezident Shavkat Mirziyoyevning Vengriyaga rasmiy tashrifi arafasida qishloq xo‘jaligi vaziri Aziz Voitov Vengriya qishloq xo‘jaligi vaziri o‘rinbosari Shandor Farkash hamda Qishloq xo‘jaligi va tabiiy fanlar universiteti rektori Chaba Dyurich bilan muzokaralar o‘tkazdi.

Uchrashuvda O‘zbekiston prezidentining Vengriyaga tashrifi doirasida imzolash uchun salmoqli hujjatlar to‘plami tayyorlandi. Ularda bog‘dorchilik, issiqxona xo‘jaligi, kartoshkachilik, uzumchilik, baliqchilik, shuningdek, sug‘urta, agrar fan va ta’lim sohalarida hamkorlikni rivojlantirish bo‘yicha qo‘shma rejalar o‘z ifodasini topgan.

Muloqot davomida tomonlar O‘zbekiston-Vengriya markaziga kelgusi yilda ishga tushirilishi rejalashtirilgan molekulyar diagnostika laboratoriyasidan samarali foydalanish bo‘yicha o‘quv dasturini tashkil etishda ko‘maklashishga kelishib oldi. 

Loyihani samarali amalga oshirish uchun Vengriya qishloq xo‘jaligi va tabiiy fanlar universitetini bosh maslahatchi etib tayinlash taklif qilindi.