O‘zbekistonda ilk bor maktab o‘quvchilarining ruhiy xolatini o‘rganishga qaratilgan tadqiqot o‘tkazildi

YUNISEF hamkor tashkilotlar bilan birgalikda tashkil etgan ushbu tadqiqotda respublikaning 14 hududidagi 299 ta maktabning 22 854 nafar o‘quvchisi ishtirok etdi.

Tadqiqotda o‘spirinlarning ruhiy salomatligi va ruhiy-ijtimoiy holatiga ta’sir qiluvchi maktab bilan bog‘liq omillarni o‘rganish maqsad qilingan.

«O‘smirlik davri ruhiy salomatlikka ziyon yetkazuvchi omillar sababli alohida e’tiborni talab qiladi. Bu o‘smirlarning o‘rganish, qarorlar qabul qilish hamda jamiyat hayotida faol ishtirok etishlariga ta’sir etadi», – deydi YuNICEFning O‘zbekistondagi vakolatxonasi rahbari Munir Mamedzade.

Tadqiqot shuni ko‘rsatadiki, 10 foizdan oshiq o‘quvchilar ijtimoiy bog‘liqlikni his etmaydi: har o‘n o‘quvchidan bittasi o‘zini maktab bilan bog‘lamaydi (8,7 foiz), undan ham ko‘prog‘i o‘zini maktabning bir qismi deb hisoblamaydi (13,1 foiz) yoki o‘zini sinfda yolg‘iz his qiladi (16,7 foiz).

Maktabdagi har 10 nafar bolaning ikkitasi jismoniy zo‘ravonlikka uchraydi. Shu sababdan maktabga borishdan qo‘rqadi. O‘quvchilarga professional psixologik yordam kerak. Ammo ularning atigi 17 foizi maktab psixologiga murojaat qiladi. Asosiy qismi ota-onasi, do‘stlari va yaqin qarindoshlaridan yordam kutishadi.