Toshkentda xalqaro hunarmandchilik mahsulotlari yarmarkasi o‘tkaziladi

Tadbirda xorijiy davlatlar — Rossiya, Qozog‘iston, Tojikiston, Qirg‘iziston, Afg‘oniston, Pokistondan hunarmandlar qatnashishi kutilmoqda. Unda Novica, Wildberries, Alibaba, Joyda, CraftmeetsDesign, iHunar kabi xalqaro hamda mahalliy onlayn platformalar ishtirok etishi rejalashtirilgan.

Ishtirokchilar tomonidan kashtachilik, kulolchilik, misgarlik, yog‘och o‘ymakorligi, gilamchilik, milliy matolar, miniatyura kabi 20 dan ortiq milliy hunarmandchilik mahsulotlari ko‘rgazmalari tashkil etiladi.

Yarmarka ishtirokchilari loydan ko‘za yasash, ipakdan mato to‘qish, do‘ppiga naqsh berish hamda beshik yasash jarayonlarida bevosita ishtirok etishi mumkin bo‘ladi. O‘zbekiston turli hududlariga xos bo‘lgan kashtachilik, kulolchilik, misgarlik, yog‘och o‘ymakorligi maktablariga xos betakror mahsulotlar hamda hunarmandlar tomonidan yasalgan esdalik sovg‘alarini xarid qilish imkoni ham yaratiladi.

Yarmarkaga tashrif buyurganlar zargar Tohir Muhammedov, kulol Alisher Narzullayev, kashtachi Ahmad Arabov, kulol Shokir Ahmadjonov, adras, atlas to‘quvchi, gilamdo‘z Ibrohim Sultonov kabi mashhur hunarmandlar mahorat darslarini kuzatish va bevosita ishtirok etishlari mumkin bo‘ladi.