Germaniyada birinchi suzuvchi gaz ombori ishga tushirildi

Mamlakat Rossiya gaziga bo‘lgan qaramlikdan voz kechish uchun jadal ish olib bormoqda.

Foto: AP

Germaniyada mamlakatdagi birinchi suzuvchi suyultirilgan tabiiy gaz (STG) terminali ochildi.

Ombor Vilhelmshafen portida joylashgan. Shanba kuni u Ispaniyadan kelgan yuk kemasini qabul qildi. Terminalning ochilish marosimida Germaniya kansleri Olaf Shols va bir qancha vazirlar ishtirok etdi.

«Bu biz Rossiya gazini almashtirish uchun rejalashtirgan beshta STG terminalidan birinchisi. Bu bizning har qanday sharoitda gaz ta’minotisiz qolmasligimizni kafolatlaydi», dedi Shols.

Kansler STG terminali rekord darajada qisqa vaqt ichida qurilganini ta’kidladi.

Terminalga Nigeriyadan keltirilgan STG quyilgan, u yil davomida 50 ming xonadonni gaz bilan ta’minlay oladi. Ta’minot ishlari 22 dekabrdan boshlanadi.