Qashqadaryoda muzlar tufayli suv toshdi

Yakkabog‘ tumanidagi Samoq mahallasi kanallari suvga to‘lib oqdi, jabrlanganlar yo‘qligi aytilmoqda.

Qashqadaryo viloyatining Yakkabog‘ tumani, Samoq mahallasi ichki kanallaridan birida suv toshdi. Bu holat tasvirlangan videolavha ijtimoiy tarmoqlarda tarqaldi. Hodisa 17 yanvar kuni tushdan keyin sodir bo‘lgan.

Qashqadaryo viloyati FVB xabariga ko‘ra, suv toshqiniga aholining o‘zboshimchaligi va muzlar sabab bo‘lgan.

«Ushbu hudud aholisi o‘zboshimchalik bilan Qizildaryodan foydalanishi ya’ni, suv taqsimlagichini ochishi oqibatida qishloqning ichki kanallaridan suv to‘lib oqishiga sabab bo‘lgan. Qolaversa, muz bo‘laklari to‘planib, suv yo‘nalishini o‘zgarishiga olib kelgan», deyiladi xabarda.

FVB suv toshqini oqibatida moddiy va jismoniy jabrlanganlar yo‘qligini ma’lum qildi.