Energetika vaziri kelgusi kuz-qish mavsumiga tayyorgarlik bo‘yicha uchta rejani aytdi

O‘zbekiston hukumati keyingi kuz-qish mavsumiga tayyorgarlik ko‘rish bo‘yicha bir nechta yo‘nalishlardagi rejalarni ishlab chiqmoqda. Bu haqda energetika vaziri Jo‘rabek Mirzamahmudov bugun, 25 yanvar kuni jurnalistlar bilan suhbatda ma’lum qildi, deya xabar bermoqda Kun.uz muxbiri.

Vazirning aytishicha, gaz yetarli bo‘lgan taqdirda ham bunaqa qattiq sovuq vaqtlarida quvurlarda baribir bosim tushadi, shuning hisobiga chekka hududlarga gaz yetib bormay qoladi. Buning yechimi sifatida bu hududlarda ikki funksiyali issiqlik markazlarini tashkil etish rejasi ko‘rib chiqilyapti: bu markazlar ko‘mirda ishlab, ham issiqlik uzatadi, ham elektr energiyasi ishlab chiqaradi.

Ikkinchidan, hukumat quyosh energiyasidan foydalanishni sezilarli oshirishni mo‘ljallamoqda. Mirzamahmudovning so‘zlariga ko‘ra, o‘tgan anomal sovuq kunlarda ham, hatto qish vaqtida kun qisqa bo‘lishiga qaramay, mavjud quyosh stansiyalari 98 foizgacha quvvatda ishlay olgan.

Quyosh fotoelektr stansiyalarini tezroq qurish maqsadida kompaniyalar tendersiz tanlab olinishi mumkin. Bunda investorlarga elektr energiyasi davlat tomonidan faqat oxirgi tenderlardagi narxlardan (2,8 sent) oshirilmagan narxlarda sotib olinishi sharti qo‘yiladi.

Energetika vazirligi rahbari uchinchi yechim chorasi sifatida ko‘p gaz yoqadigan sanoat korxonalari (qurilish materiallari ishlab chiqaruvchilar va issiqxonalar – ular umumiy gaz iste’molining 8-10 foizini tashkil etadi) ko‘mirga o‘tkazilishini aytdi.

Eslatib o‘tamiz, kuni kecha bosh vazir Abdulla Aripov o‘tkazgan selektorda ham kutilayotgan ayrim choralar haqida aytib o‘tilgan edi: