O‘zbekiston va Mo‘g‘uliston o‘rtasida hamkorlik bo‘yicha hukumatlararo qo‘shma komissiya tuziladi

Muloqot chog‘ida ikki mamlakat o‘rtasidagi savdo-iqtisodiy, investitsiyaviy va sanoat kooperatsiyasi sohasidagi hamkorlikning bugungi holati va uni rivojlantirish istiqbollari muhokama qilindi.

O‘zaro tovar ayirboshlash hajmining keyingi yillarda uch barobarga o‘sishining ijobiy dinamikasi qayd etildi. Tomonlar joriy ko‘rsatkichlarni sezilarli darajada oshirish uchun qator imkoniyatlar mavjudligini ta’kidlab, ikki mamlakat o‘rtasidagi o‘zaro tovar ayirboshlash nomenklaturasini kengaytirish va hajmini oshirish choralarini ko‘rish bo‘yicha Ishchi guruh tuzishga kelishib oldilar.

Investitsiyaviy hamkorlik va sanoat kooperatsiyasini kengaytirish istiqbollari tahlil qilindi. Qishloq xo‘jaligi, yengil va elektrotexnika sanoati sohalarida aniq loyiha takliflarini o‘zida mujassam etgan Sanoat kooperatsiyasini rivojlantirish bo‘yicha qo‘shma dasturning qabul qilinishi bu boradagi ustuvor va birinchi darajali chora-tadbirlar sifatida belgilandi. Tomonlar Toshkent va Ulan-Bator shaharlarida qo‘shma biznes-forum va ko‘rgazmalar o‘tkazishga kelishib oldilar.

Uchrashuv yakunlari bo‘yicha O‘zbekiston i va Mo‘g‘uliston o‘rtasida hamkorlik bo‘yicha Hukumatlararo qo‘shma komissiya tuzish to‘g‘risida Bitim imzolandi.