Navalniy hamkasbi Mariya Pevchix xalqaro KQKF rahbari bo‘ladi 

ACF International (Korrupsiyaga qarshi kurash fondining (KQKF) xalqaro nomi) direktorlar kengashining yangi raisi Mariya Pevchix bo‘ladi. Bu haqda Aleksey Navalniy ijtimoiy tarmoqda xabar berdi. Pevchix bungacha KQKF surishtiruv bo‘limi rahbari bo‘lib ishlagan. 

«Oxirgi ikki yil davomida olib borgan jamoat ishlari uni jonli siyosiy yetakchi sifatida namoyon etdi. Siz uni yaxshi bilasiz va men ham uning vazifalarni a’lo darajada bajara olishiga shubham yo‘q», deb yozdi Navalniy. 

Bungacha KQKF raisi sifatida Leonid Volkov ishlagan edi. Ammo 2022 yilda Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrelning ofisiga o‘z hamkasblarini xabardor qilmasdan yuborgan maktubi bilan bog‘liq mojarodan so‘ng, 9 mart kuni u lavozimini tark etishini ma’lum qildi. 

Volkov o‘z maktubida Borrellga sanksiyalarni bekor qilishning aniq mezonlarini yozishni taklif qilgan. Siyosatchining ta’kidlashicha, Kreml kursini qo‘llab-quvvatlamagan ko‘plab ishbilarmonlar nohaq jazolangan. Misol tariqasida u «Alfa Grupp» aksiyadorlari Mixail Fridman, Petr Aven, German Xan va Aleksey Kuzmichevni keltirib, ularni Yevropa Ittifoqi sanksiyalari ro‘yxatidan chiqarishni taklif qilgan.