Vashington Belarus muxolifati bilan strategik muloqotni boshlaydi

Joriy yil oxirida AQSh Belarusdagi demokratik harakat va fuqarolik jamiyati vakillari bilan «keng qamrovli strategik muloqot»ni boshlaydi. Bu haqda AQSh Davlat departamenti saytida xabar qilinganidek, davlat kotibi o‘rinbosari Vendi Sherman Vashingtonda Belarus muxolifati yetakchisi Svetlana Tixanovskaya bilan uchrashuvda ma’lum qildi.

Tomonlar muloqot AQSh ma’muriyatining Belarus bilan shug‘ullanuvchi idoralarini «belarus demokratik faollarining keng doirasi, jumladan, siyosiy yetakchilar, fuqarolik jamiyati vakillari, mustaqil jurnalistlar, huquq himoyachilari, huquqshunoslar, kasaba uyushmalari yetakchilari, akademiklar va oddiy belaruslar bilan bog‘laydi» degan umidda, deyiladi bayonotda.

Bundan tashqari, Qo‘shma Shtatlar davlat kotibi o‘rinbosari Tixanovskaya bilan uchrashuvda «AQShning Belarus xalqining o‘z mamlakati demokratik, suveren va barqaror kelajagiga intilishlarini qo‘llab-quvvatlashga sodiqligini» ta’kidladi, deb ta’kidlab o‘tdi Davlat departamenti matbuot kotibi o‘rinbosari Vedant Patel.

Belarus muxolifati yetakchisi Svetlana Tixanovskaya Vashingtonga tashrifi chog‘ida Belarusni Rossiya bilan aloqalarni uzishga chaqirdi. 22 mart kuni AQSh Kongressida so‘zga chiqib, u Kremlga Ukrainaga hujum qilish uchun Belarusdan foydalanishga ruxsat bergan Aleksandr Lukashenkoning harakatlarini tanqid qildi.

Tajovuzkor mamlakat «Ukrainaga hujum qilish va unga tahdid solish» uchun Belarus, uning havo hududi va infratuzilmasidan harbiy maqsadlarda «erkin foydalanadi», dedi Tixanovskaya. 

«Rossiyaning Belarus ichki ishlariga aralashuviga qarshi turish vaqti keldi. Rossiya noqonuniy rejimni qo‘llab-quvvatlab, milliy o‘zligimizga qarshi mustamlakachilik harakatlarini amalga oshirmoqda», - dedi u. Belarus prezidentligiga sobiq nomzod mamlakatni Ukrainaga qarshi urushda qatnashishni to‘xtatishga chaqirdi.