Yangilanayotgan konstitutsiya “snos” bilan bog‘liq muammolarga to‘la barham beradi

Keyingi yillarda respublikada qurilish ko‘lamining ortishi “snos”lar bilan bog‘liq muammolarni yuzaga keltirdi: fuqarolarning davlat ehtiyojlari uchun, deya olib qo‘yilgan hovlilari o‘rnida ko‘p qavatli uylar tiklandi. Ammo uyi buzilgan fuqarolarning barchasi ham to‘liq rozi qilinmadi, qurilish sabab kimlarningdir uyiga yetkazilgan zararlar qoplab berilmadi. Vaziyat shu darajaga yetib bordiki, quruvchilar va fuqarolar o‘rtasidagi ziddiyat janjalga aylana boshladi.

Bu voqealar konstitutsiyaga “snos” muammosiga barham berish bilan bog‘liq norma kiritish zarurligini ko‘ratib bergandi.

Yangi tahrirdagi konstitutsiyaning 47-moddasida aynan “snos” muammosining yechimi belgilab qo‘yildi. Unga ko‘ra, endilikda hech kim sudning qarorisiz va qonunga nomuvofiq holda uy-joyidan mahrum qilinishi mumkin emas.

Uy-joyidan mahrum etilgan mulkdorga uy-joyning hamda u ko‘rgan zararlarning o‘rni qonunda nazarda tutilgan hollarda va tartibda oldindan hamda teng qiymatda qoplanishi ta’minlanadi.

Moddada davlat uy-joy qurilishini rag‘batlantirishi hamda uy-joyga bo‘lgan huquqning amalga oshirilishi uchun shart-sharoitlar yaratishi ham nazarda tutilgan.