Minsk Rossiyaning Belarusda yadro qurolini joylashtirish rejalariga izoh berdi

Belarus Tashqi ishlar vazirligi Rossiyaning taktik yadro qurollari uchun maxsus saqlash omborini qurish «YaQshning I va II moddalari qoidalariga zid emasligini» ma’lum qildi.

Belarus Tashqi ishlar vazirligi, Minskning fikriga ko‘ra, Rossiya taktik yadroviy qurollari (YaQ) uchun maxsus ombor qurilishi nima uchun Yadro qurolini tarqatmaslik to‘g‘risidagi shartnomaga (YaQsh) zid emasligini tushuntirdi. Tegishli bayonot 28 mart, seshanba kuni Belarus TIV saytida e’lon qilindi. 

Muayyan o‘q-dorilar bilan samolyotlarni boshqarishga qodir belaruslik uchuvchilarni tayyorlash, bunday samolyotlarni modernizatsiya qilish, shuningdek, Belarus hududida yadro kallaklarini ular ustidan nazoratni Minskka o‘tkazmasdan joylashtirish, shuningdek, tegishli texnologiyalardan foydalanish «hech qanday tarzda YaQshning I va II moddalari qoidalariga zid kelmaydi», deb ko‘rsatilgan Tashqi ishlar vazirligi izohida. 

«Belarus va Rossiya o‘rtasidagi harbiy hamkorlik qat’iy xalqaro qonunlarga muvofiq amalga oshirilmoqda», deya ma’lum qildi Minsk va qo‘yilayotgan qadamlar «yangilik» emasligini qo‘shimcha qildi. 

Belarus Tashqi ishlar vazirligi mamlakat hududida yadro qurolini joylashtirish rejalarini «o‘z xavfsizligi va mudofaa qobiliyatini mustahkamlashga qaratilgan majburiy javob harakatlari» deb atadi. 

25 mart kuni Rossiya prezidenti Vladimir Putin Belarusda rus taktik yadro qurollarini joylashtirish uchun maxsus ombor qurilishi 1 iyulda yakunlanishi kerakligini ma’lum qildi. O‘nta samolyot ushbu turdagi qurollardan foydalanishga tayyor, «Iskander» tashuvchi kompleksi topshirildi, dedi Putin. Unga ko‘ra, ekipaj mashg‘ulotlari 3 apreldan boshlanadi. 

Siyosiy tahlilchi Artem Shraybman avvalroq Rossiya va Ukraina o‘rtasidagi urush global darajaga – Rossiya va NATO o‘rtasidagi to‘qnashuvlarga ko‘tarilsa, bunday vaziyatda Belarus nishonga aylanishi mumkinligi haqida fikr bildirgan edi. 

«Bu qurollar qanchalik kuchli ekanligiga qarab, yaqin atrofdagi shaharlar va butun mamlakat aholisi uchun tahdid. Belarus potensial jang maydoniga aylanadi, bu asosiy xavf», dedi u.