Anomal sovuq bog‘larni zararladi. Bu meva narxiga qanday ta’sir qiladi?

Shu yil yanvar, fevral oylarida kuzatilgan anomal sovuq O‘zbekistonda nafaqat issiqlik va elektr ta’minotidagi muammolar, balki qishloq xo‘jaligi ekinlari, mevali bog‘larni sovuq urishi va uning oqibatlari bilan ham tashvishli bo‘ldi.

Foto: Kun.uz

Shu kunlarda tahririyatimizga ekinlarini sovuq urishi bo‘yicha bog‘ egalari va tadbirkorlardan murojaatlar yetib kelmoqda. Ularda yuzlab gektar mevali bog‘larni sovuq urgani, bunda ba’zi bog‘lar batamom qurish, yana ayrim bog‘lar endigina qayta o‘sish jarayonida ekanini ko‘rish mumkin.

Yuborilgan murojaatlarda tadbirkorlarni sovuq urgan bog‘lar uchun qanday yordam olish mumkinligi, bank va soliq organlari oldidagi majburiyatlar borasida yengilliklar bor, yo‘qligi haqida ma’lumotlar ham qiziqtirgan.

Kun.uz muxbiri tadbirkor va bog‘ egalarini qiziqtirgan savollar, shuningdek, meva bog‘larini sovuq urishi yozda meva narxiga qanday ta’sir o‘tkazishi borasidagi savollar bilan Qishloq xo‘jaligi vazirligi huzurida Qishloq xo‘jaligida xizmatlar ko‘rsatish agentligiga murojaat qildi. Savollarimizga agentlik bo‘lim boshlig‘i o‘rinbosari Jamshid Saydullayev javob berdi.